Volleyball-ah Friends Club leh Chhim Veng te an champion

/
Serchhip District Volleyball Association buatsaih Season Opening Tournament chu nizan khan khelh zawh a ni a, Hmeichhia-ah Friends Club, New Serchhip leh Mipa-ah Chhim Veng Volleyball Club ten an khingpui te hnehin an champion.

He Tournament kharna inkhawm hi nimin tlai khan Vengchung Volleyball Court-a neih a ni a, he hun hi SDVA Sr. Vice President, VL. Hruaitluanga chuan kaihruaiin he hun Khuallian nia hmanpuitu, Lalremruata Ralte, Chairman, Serchhip District Sports Committee chuan Ser-chhip District-a infiammi ten nasa taka hma an sawn thu sawiin, amaherawh chu sum leh pai harsatna avangin duh anga hmasawnna chu kal zung zung thei a nih loh thu a sawi a. Chutiang karah chuan Serchhip District Volleyball Association chu District Sports Committee hnuaia Regognized Association 20 te zingah a nung ber leh hma-sawn ber te zing ami an nih thu sawiin, sum leh paia harsatna kara an hmalakna hrang hrangte chu lawmawm a tih thu a sawi bawk.
Nimin tlai-a Hmeichhe Final khelh ah Friend Club, New Serchhip chuan Vengchung Volley-ball Club chu 3-0 a hnehin an champion a, he inkhel ah hian Friends Club hian Set hmasa ber chu 25-18 a lain Set hnihna pawh 25-23 in an la leh hram a, Set thumna chu 25-20 a lain an champion zui ta a ni.
Hmeichhe lama Champion, Friends Club hian lawmman ah Rs. 4000/- dawngin pahnihna hian Rs. 2000/- an dawng bawk a, Best Spiker ah Zonunsangi, Vengchung Volleyball Club chu thlan niin Best Setter-ah Lalrammawii, Friends Club leh Best Defender-ah Lalrinkimi, Friends Club te thlan an ni bawk.
Nizan khan Mipa Final hi Serchhip-a a vawikhatna atan Electric eng hnuaia khelh a ni a, Chhim Veng Volleyball Club leh Friends Club, New Serchhip te intumin Chhim Veng Volleyball Club hian Straight Set, 3-0 a hnehna changin an champion a ni. Nizan a Mipa Final ah hian Chhim Veng Volleyball Club hian Set hmasa ber chu 25-20 a lain Set hnihna pawh 25-20 in an la leh a, Set thumna ah hian Friends Club hian \an la viau mah se Chhim Veng lam hian 25-19 a set la lehin an champion ta a ni.
Mipa-ah hian Champion Team hian lawmman ah Rs. 8000/- dawngin pahnihna hian Rs. 4000/- an dawng thung a, Best Spiker-ah C. Lalsangliana, Chhim Veng Volleyball Club, Best Setter-ah H. Rohmingliana, Chhim Veng Volleyball Club leh Best Defender-ah Lalchuang-kima, Friends Club te thlan an ni bawk a, mimal lawmman (Mipa leh Hmeichhia) hi Mizoram Volleyball Association-a Vice Pre-sident, David Aizampuia chuan a rawn tum sak a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »