Mizoram hmun hrang hrangah Chapchar Kut hman a ni.

‘Tu te mah inlahrang thei kan awm lo’ - Chief Minister


Mizote Kut zinga ropui leh hriathlawh ber Chapchar Kut chu nimin khan Mizoram hmun hrang hrangah hman a ni a. Chapchar Kut 2017 lawmna pui ber chu  Aizawl Sipai Lammual-ah neih niin Chief Minister, Lal Thanhawla chu Kut Pa a ni a, Art & Culture Minister, R. Romawia chuan kut a thleng a ni bawk.

Kumin a Chapchar Kut-ah hian a  vawikhatna atan thupui thlanbik neiin Chapchar Kut hi hman a ni a. Mizo hnam rohlu ‘Aia Upate Zah’ tih chu kumin Kut thupui atana thlan a ni. Aizawl-a Chapchar Kut hmanna ah hian Kut Pa, Lal Thanhawla, Chief Minister chuan Zoram dung leh vanga Mizote Chapchar Kut chibai bukin, he Kut ropui tak hian hmun hrang hranga awm Zohnahthlakte chhulkhatkual kan ni tih leh kan awmna hmun \heuh hi Pathian min pek a ni tih hre thar leh turin a chah a. Tu te mah inla hrang thei kan awm lo tih hriatna hian min phuar khawm se, he Kut hian Zohnahthlak inpumkhatna leh inunauna tinghet zel se a duh thu a sawi a ni. Kut Pa chuan kumin Chapchar Kut thupui ‘Aia Upa Zah’ chu Mizo nun ze mawi, \hangtharten kan chhawm nun zel tur a ni tiin aia upa te zaha nu leh pa chawimawi \hin te chuan malsawmna an dawng \hin, a ti a. “Zoram thar leh nuam, sum leh pai leh ei leh bara intodelh ram siam turin mi zawng zawngin mawh kan phur a; dikna, rinawmna, taimakna leh Pathian tih a pawimawhzia hriaa Chapchar Kut hi min kai harh thartu nise,” tiin Chief Minister chuan a sawi bawk.
He hunah hian Kut thlengtu Art & Culture Minister, R.Romawia pawhin Chapchar Kut chu inremna leh inlungrualna Kut a ni tiin Mizo nun ze mawi tlawmngaihna, rinawmna, taimakna leh aia upa zah thiam vawng nung zel turin kalkhawm te a sawm a. Chapchar Kut chu hlimna leh lawmna kut anih angin hlim taka Kut hmang turin mipuite a sawm a ni. 
He huna thusawitu dang Central YMA President, Lalbiakzuala chuan changkanna kar ah hnam rohlu vawn nun leh chawilar a pawi-mawh tih sawiin, Kut hmangtuten Mizo thuam inbel duh tawk mai lova, Mizo nun mawi a taka nun chhuah pui \heuh turin he huna tel te chu a sawm bawk.
Aizawl-a Chapchar Kut-ah hian Mizo Hnam nun leh hnam ziarang tilang thei thil chi hrang hrang mimal leh pawl hrang hrangin an entir a. Mizo Hnam Lam, Mal Zai leh Zaipawl, Beat Group, Lengkhawm Zai, Costume Parade, Darbu Zaipawl, Mizo Indigenous Games leh Pawnto te bakah Kut hmangtuten chhawng an hnawt bawk. Mizo hnam lam an entir zingah Vapual lam, Salu lam, Sarlamkai, Chai, Parlam, Rallu lam, Siktuithiang Lam leh Cheraw Kanpui te a tel a. Kut Pa Mizoram Chief Minister, Lal Thanhawla’n Chapchar Kut puala buatsaih Souvenir a tlangzarh nghal bawk.
Aizawl-a Chapchar Kut 2017 lawmna hi kawng hrang hrangin kalpui a ni a. Sorkarin thuchhuah siamin sorkar hnathawk zawng zawng te chu March ni 1 leh ni 2-ah Mizo hnam incheia inchei tura hriattir an nih angin sorkar hnathawk ten an zawm \ha hle a. Kut denchhenin Art Exhibition, Museum Exhibition, Photo Exhibition leh Flower Show  buatsaih niin Aizawl Sipai Lammual Basketball Ground-ah Food Fest leh Handloom Show-te buatsaih a ni bawk. Kumin a Chapchar Kut chhim tur hian Myanmar, Bangladesh, Tripura, Manipur leh Meghalaya a\angin Zohnahthlak te an lokal a, heng mite hian Hnam Lam chi hrang hrang an entir ve bawk a ni.
Chapchar Kut hi Mizoram khawpui hrang hrangah pawh urhsun taka hman a ni hlawm a, Serchhip-ah erawh chuan tun thla ni 24 khian Chapchar Kut hi hman a ni dawn thung a, hei hi Serchhip khua in karleh maiah Zoram pum huap Presbyterian Kohhran Hmeichhe Inkhawmpui Lian a thlen tur atana inbuatsaiha ngawrh taka kalpui a nih mek vang niin inbuatsaihna pawh kalpui mek a ni bawk.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai