Mizoram hmundangte rualin Serchhip-ah Road Safety Week vawi 28-na hman tan a ni
Mizoram pumah nimin khan kawngpui-a lirthei vanga chetsualna thleng thei laka fimkhur tura inzirtirna Hapta, Road Safety Week vawi 28-na chu hman \an a ni a, Serchhip-ah pawh he Hapta hi nimin khan hawn a ni.
Serchhip-a Road Safety Week hawnna inkhawm, Serchhip DC’s Conference Hall a neih ah hian Bawrhsap, Dr. Lalrozama chuan, “Ramin hma a sawn zela lirthei pawh a pung zel a, lirthei khalh thiam hrim hrim pawh kan tam tawh hle a ni. Amaherawh chu danin a phut anga him leh rintlak a khalh dan hriatna kawngah erawh chuan hmasawnna tur kan la ngah hle lawi si a ni,” a ti a. Driver kan tih hian khualzin leh bungraw phurtu lirthei khalhtute ringawt kan rilruah a awm ang tih a hlauhawm tih sawiin, “Lirthei tam zawk hi chu mimal leh chhungkaw bil ta a ni a. Mahni ta a nih hre ran chunga mahnia lo inzir thiam ve mai te kan nih fur bawk si avangin mimal lirthei khalhtu, dan hriat leh fimkhur thua ngaihtuah awm tak tak kan tam hle a ni,” a ti. Bawrhsap chuan lirthei khalhtu tam tak ten dawhtheihna an la tlachham deuh nia a hriat thu pawh sawiin, chetsualna tam tak hi chu dawhtheihna hmanga umbo theih nia a hriat thu a sawi bawk.
Serchhip-a Road Safety Week hawnna inkhawmah hian Mizoram State Transport Authority-a Member, Lalramliana Sailo, Serchhip chuan Road Safety Week, 2017 thupui, “Nang leh i chhungte an him theih nan, Lamlian-ah fimkhur ang che” tih thupui hmangin thuchah a sawi bawk a ni.
Road Safety Week hawnna inkhawm hi District Road Safety Committee Member Secretary, B. Lalrinsanga, Serchhip DTO ni bawk chuan kaihruaiin Week chhunga hmalak dan tur District Committee in a ruahman hrang hrangte a tarlang a. He Week hman chhung hian Serchhip a lirthei khalhtu, a bikin Public Service Driver te leh a duh apiang tan naktuk, February 8, 2017 khian training buatsaih a ni dawn a, Batch hniha kalpui tur a ni ang. Tin, lirthei enfiahna Police, Traffice leh MVI \angrualte chu nei tura beisei an ni a, Serchhip-a Cable TV-a tihchhuah turin Talk Show huaihawt tum a ni bawk.
Comments
Post a Comment