Harsatna tam tak paltlang hnua State sualchhuah ngaihhlut tur a nih thu Larsap in a sawi

Nimin Feb. 20, 2017 kha Mizoram State Day vawi 30-na a ni a, Mizoram State chhungah sorkar chawlh puan a ni a, a hmanna hun hranpa erawh siam a ni lo a. Mizoram Larsap chuan remna leh muanna nei turin kum 20 chhung teh meuh rambuai kan paltlang tih sawiin, harsatna tam tak paltlang hnua State sual chhuah hi ngaihlut tur a nih thu a sawi.

Nimin a Mizoram State Day pual hian Mizoram Governor, Lt. Gen. Nirbhay Sharma chuan mipuite hnenah thuchah sawiin, kum 30 kalta, vawiin angah khan Mizoram tana mellung pawimawh tak chu phun a ni tih a sawi a. “August ni 14, 1986-ah President in remtihna hming a ziah hnuah Mizoram chu India rama State 23-na ni turin February ni 20, 1987 khan Assam Rifles Ground, Aizawl-ah a lawmna hun hmangin hlankai a lo ni ta a. Mizo mipuiten State nihna nei tur leh remna leh muanna nei thei tura man an pek a sang hle a, kum 20 chhung teh meuh rambuai an paltlang a. Chuvangin, harsatna tam tak paltlang hnua State sual chhuah hi ngaihlut tur a ni,” a ti. Larsap chuan Mizoram hian State dangte aiin hmasawnna kawng zawh tlai deuh mahse kawng \henkhatah erawh chuan an um phakloh khawpin hma a sawn chak thung tih a sawi a, Mizoram in kawng dik a zawh theihna tura mipui leh sorkarin tha thlah hauh lova an beihna chu a chhuanawm tih a sawi bawk.
Larsap chuan Mizoram State hian kum 30 chhung khan thil inthlakthleng tam tak leh harsatna te pawh a paltlang tih sawiin, heng zawng zawng hian State \han zelna kawngah nghawng inanglo tak tak a nei tih a sawi a, Mizo khawtlang nunphung danglam tak, \henrualte nena insuihzawm tlat a nihna te chu a hlu tih sawiin, inpumkhatna \ha tak hi hmang \angkaiin tun aia lehkhathiam, fing leh remhria, hrisel leh mahni mawhphurhna hlen-chhuak \hin hnam an nih zel a beisei tih a sawi a. “Hmalam hun lo thleng thlir chuan, phatrual lohvin Mizoram hi chak taka hmasawn thei tur dinhmunah a ding a. Thutlukna siam zawng zawng leh ke pen tinte hian Mizo mipuite beiseina leh theihna famkim lanchhuahna tur a hril a ni tih hriat a pawimawh a, a panna kawng thui leh biboh tak hi zawh chhuah anih phawt chuan hlawhtlinna in a hmuak ngei ang,” a ti bawk.
June 30, 1986-a India sorkar leh MNF-te'n inremna thuthlung an ziah hnuah Mizoram chu state puitlinga hlangkai turin ruahmanna siam a ni a; August 7, 1986-ah state puitlinga Mizoram hlankaina tur bill chu Lok Sabha ah pharh niin, an pass a, member 310 zinga 308-in an thlawp a. Rajya Sabha-ah pawh member 171 zinga 160 in thlawpin an pass leh a; August 14, 1986-a India President-in hming a ziah hnan hnuah 53rd Constitution (Amendment) hnuaiah Mizoram chu India rama State 23-na a ni ta a ni.
Feb. ni 20, 1987-ah khatihlaia India Prime Minister, Rajiv Gandhi chu Mizoram-ah lo kalin, zing dar 9:30-ah Lammual-a mipui tam tak kalkhawmte hmaah Mizoram State nihna chu a puang a; Lammual-a Mizoram state puanna inkhawmah hian state lawm nan hian rei tak chhung darkhuang vuak a ni a; Chief Minister, Laldenga'n Rajiv Gandhi chu 'Thangchhuah diar' a khimtir a, a nupui Sonia Gandhi chu Ngotekherh a bihtir bawk. Prime Minister hi a fate - Rahul Gandhi leh Prya Gandhi leh Union Supply Minis-ter, Ghulam Nabi Azad ten an \awiawm a ni.
He hunah hian State lawm nan Mizo hnam Lam chi hrang hrang entir a ni a, Khatla zaipawl te'n 'Kan ram Krista tan kan pe' tih hla an rem a. PC Girls sikul naupangte'n naupang infiam leh pawnto an entir a; India rama state 23-na a nih entir nan parva 23 chhuah a ni bawk.
Mizoram State-a puan a nih hnu hian Mizoram Lt. Governor ni lai chu Gauhati High Court Chief Justice-in Governor atan rinawmna thu tiamtirin a lalut a; Chief Minister atan Lal-denga bakah, Minister atan Zoramthanga, Rual-chhina leh Tawnluia te rinawmna thu tiamtira lakluh an ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai