Ramchhung hmundang rualin Serchhip-ah Teachers’ Day urhsun taka hman a ni.

Ramchhung hmundangte rualin Zirtirtute Ni, Teachers’ Day vawi 53-na nimin Sept. 5, 2014 khan Serchhip-ah pawh hman niin zingkar ah a huhova hman a nih bakah chhun lamah zirna In ten anmahni remchan dan angin an hmang bawk a ni.
Serchhip-a Teachers’ Day hmanna ah hian ‘Ro chhe theilo thiamna min petu zirtirtute I chawimawi ang u’ tih chu thupui ah hman niin Serchhip District Teachers’ Day Celebration Committee huaihawtin zingkar ah Serchhip Bazar-ah he Ni pual hian inkhawm neih a ni a. He hun hmanpuitu District Bawrhsap Pi Juhi Mukherjee, IAS chuan Zirtirtute hlutzia leh chawimawi phu an nih zia uar taka sawiin zirlaite chu an lo puitlin hunah eng dinhmun sangah pawh ding se anmahni chherchhuaktu an zirtirtute theihnghilh ngailo turin a chah a. Zirtirtute pawh naupangte an zirtir kawngah \hahnemngaih chhuah lehzuala naupangte rilrua dilchhutna, zirbelh zel duhna thinlung leh khua leh tui \ha nih duhna thinlung tuh sak tura chahin; chutiang bawka anmahni pawh inbuatsaih reng turin a chah bawk a ni. Zirtirtu hmun kilkhawr leh hla zawka awmte chu an mawhphurhna a sang lehzual tih pawh sawiin, naupangte an enkawlna kawngah \hahnem ngaihna rilru diktak neih a \ul thu leh Mizoram hmun kilkhawr ber berte ti eng tu chu heng hmuna thawktu zirtirtute hi an ni tih sawiin, an inpekna ngaihsanawm a tih thu a sawi bawk.
    Serchhip-a Teachers’ Day puala inkhawm hi Pu Zohmingthanga, District Education Officer chuan kaihruaiin Pu Lalzuiliana, Headmaster. Govt. JM High School chuan fuihna thu sawiin Education Minister in he Ni puala thu-chah a siam chu chhiarchhuah a ni bawk a, zirlaite hnen a\angin zai mawi tak tak ngaihthlak a nih bakah he ni puala au hla (Slogan) inphuahsiakna a lawmman pakhatna dawng tu, Pu R.Sanghmingthanga, Medical Quarters, Serchhip hnenah lawmman hlan a ni bawk a ni. Teachers’ Day pual hian chhun lamah zirna In hrang hrangte chuan anmahni remchan dan angin hun an hmang hlawm a, he Ni puala District Bawrhsap in thuchah a siam chu District chhunga Cable TV hrang hrangah pekchhuah ni bawkin chawhnu lamah sorkar thuchhuak angin Zirna In tinah TV/Radio kaltlangin India Prime Minister in Zirtirtute Ni puala a thuchah ngaihthlak a ni bawk.

Popular News