Mizoram hmundangte rualin Serchhip-ah Mizoram State Anti-Tobacco Day hman a ni.

Mizoram sorkar in Mizoram puma vaihhlo leh a kaihhnawih dona Ni, Mizoram State Anti-Tobacco Day atana Sept. 11 a puan angin Serchhip-ah pawh nimin khan Anti-Tobacco Day hi hman a ni.

Mizoram State Anti-Tobacco Day hi Serchhip-ah chuan Govt. Higher Secondary School, Marian H/S leh JM H/S bakah PCR H/S-ah hman a ni a, PCR H/S-a he Ni puala inkhawm neih ah hian Dr. ZD. Lalmuanawma, District Medical Superintendent chuan zirlaite hnenah Mizoram chu mihring kum 15 tling chin, vaihlo leh a kaihhnawih ti nasa ber kan nih thu leh hetiang tihin mihring hriselna a khawih pawi theih dan hrang hrang te a sawi a. India ram mipui 41% vel chu vaihlo leh a kaihhnawih ti \hin an nih laiin Mizoram-ah chuan 67.2% lai a ni tih sawiin, Vaihlo zial khu ah hian taksa tana natna thlen thei chi 100 vel a awm thu leh heng zinga 60-90 vel chuan Cancer an thlen thei tih a sawi a, Mizote zinga Cancer vei an tam em em chu zuk leh hmuam tia kan sang ber nen thil inzawm nia a rin thu a sawi bawk. Hei bakah hian Dr. Muantea chuan Hrawk leh ka chhung bawr vel Cancer tam ber chu zuk leh hmuam ti \hin an nih thu leh, Chuap Cancer zinga 90% pawh zial zu \hin an nih tih hriat a nih thu sawiin, zuk leh hmuam tih hian natna dam thei lo min siam nasa hle tih a sawi bawk.
    PCR H/S Serchhip-a Mizoram State Anti-Tobacco Day puala inkhawm hi Pu VL. Remliana, Addl. DC in kaihruaiin Mizoram chu Kristian ram ni siin, India ramah zahthlak takin vaihlo leh a kaihhnawih ti nasa ber kan ni reng mai tih sawiin, hei vang hian Mizoram sorkar chuan May 31-a World No Tobacco Day hman mai duh tawk tawh lovin vaihlo leh a kaihhnawih ti \hin ten an sim theihna tur leh, a la ti ve ngailo ten an tih ve hauh loh nana hma laa beihpui thlak \ul a tih avangin Sept. 11 chu Mizoram Sate Anti-Tobacco Day atana puangin kumtin hman \hin tawh tur a nih thu a sawi bawk. Serchhip-a Mizoram State Anti-Tobacco Day hman a nih hnu hian Serchhip District Anti-Tobacco Squad member-te chuan khawchhung hmun pawimawh laiah te puipunna hmuna Meizuk khapna Dan bawhchhia an awm leh awm loh vaiin Special Drive an neih chhunzawm nghal a ni.