Thuthar thenkhat :

YMA \hukhawm dawn

@@ Vawiin chawhma dar 10:30 hian YMA Sub-Hqrs. Coordination Committee (SCC) chu YMA Sub-Hqrs. Office, Serchhip-ah an \hukhawm dawn a. He \hutkhawm ah hian thla thar Sept. 29 a\anga Ratu-a YMA General Conference neih tura Agenda, Kumpuan leh Chhiatni/ \hatni kaihhruaina ennawn tura rawtna lut te an thlifim ang.

Cabin Room siam belh
@@ Serchhip District Medical Superintendent, Dr. ZD. Lalmuanawma chuan JN Hospital Serchhip-a Cabin pakhat (1) chauh awm mek chu siambelh a nih thu tunhnaia MJA (SD) hruaitute nen an inkawmna ah a sawi a. Cabin atan hian tun-hma lama RSBY buaipuitu ten an Room atana an hman chu ruahman niin tunah hian peihfel \ep niin hun reilote ah luah theih beisei a ni.

Tuizem-ah Tur phul
@@ Inrinni (16th.Aug) zing khan Vanlalenga (42) S/o Hrangthuana (L), Vartekkai chuan Hnahthial Peniel Veng a Pu R. Lalnghinga te Tuizem ah Sazu tur a thlak a, hei hi hriat a nih hnuah Vanlalenga hi manin thubuai siam sak a ni. Vanlalenga hi Pu R. Lalnghinga fanu pasal hlui niin a in-\hen vanga rilru na in hetiang hian a ti niin a insawi a ni.
Rawngbawlna nei
@@ BCM Serchhip chuan Gospel Herald Team Speaker Upa Lalhuliana Chhangte Speaker-ah hmangin kar hnih kalta a\ang khan an Biak In ah rawngbawlna an nei a. Presbyterian Serchhip Kawnpui Kohhran pawhin tunkar a\ang hian an Biak In-ah rawngbawltu ruaiin Kohhran hruaitute tan camping an buatsaih \an bawk ang.

Phai pan zingah Cancer tam
@@ Hospital & Medical Education hotute chuan Mizoram damlo phai-lam damdawi In a refer zingah Cancer an tam ber nia sawiin, April 2013 a\anga February 2014 inkar chhung khan Medical Board chuan phailam-ah damlo refer 2307 a nei a, heng zingah hian mipa tam zawkin 1257 an awm a, hmeichhia 1050 an awm bawk niin an sawi a. Heng damlo refer zingah hian Cancer a tam ber bakah hian Tha-na benvawn leh Zunthlum ten an dawt a ni. Mizoram sorkar hian phailamah damlote inenkawlna tur damdawi In pawm (recognize) 41 a nei mek a ni.

NLUP sem zui thuai tum
@@ Mizoram sorkar in NLUP a kal-pui mekah 1st Phase leh 2nd Phase \anpuina chu sem zawh ni tawhin 3rd Phase leh 4th Phase pawh sem leh thuai tum a ni a. NLUP atana sum mamawh tur cheng vbc. 2,526.98 chu June 19, 2009 khan Planning Commission ah thehluh a ni a, Cabinet Committee on Economic Affairs (CCEA) chuan Aug. 2010 khan kum 5 atan cheng vbc. 2,873.13 pek remti in hemi a\ang hian kalpui mek a ni.

Mizoram-a ran lakluh tlem
@@ Tlabung kaltlanga Bangladesh a\anga Mizoram-a ran lakluh chu a kum telin a tlem tial tial nia sawi a ni a, hei hi Bangladesh ramchhung buaina in a nghawng avanga inkalpawhna harsat vang leh a ruka ran lalut an pun vang nia rin niin kumin January a\anga June thle tawp thleng khan Bangladesh a\ang hian Mizoram-ah ran 308 lakluh a ni tawh a, heng te hi Ui 305, Kel 2 leh Vawk 1 a ni.

Popular News

Mizoram-ah Faina Hapta hman \an leh a ni

Retailer bukna diklo 3 man

MZU-a VC tur ruat thar a ni