Indigenous leh Permanent sawifiah turin thawn.

State Technical Entrance Examination 2014 Category-I a Chakma zirlai 38 leh hnamdang 3 dahluh an nih chungchangah Higher & Technical Education chuan ‘The Mizoram Selection of Candidates for Higher Technical Courses Rules, 1999’ in Indigenous leh Permanent a tih chu hrilhfiah chiang turin Law Department-ah an thawn.

Higher & Technical Education Minister Pu R. Romawia chuan Law Department a\anga Indigenous leh Permanent tih hrilhfiahna an hmuh hunah thutlukna an siam tur thu a sawi a. Zawhna chhangin H&TE Minister chuan, ‘The Mizoram Selection of Candidates for Higher Technical Courses Rules, 1999 in Indigenous leh Permanent a tih hi keini sawifiah ve ngawt chi a ni lo,’ a ti a. ‘Chuvangin a hrilhfiah turin dan lam khawihtu Law department kan thawn a. An ni hian uluk takin a hrilhfiahna an ngaihtuah ang a, an hrilhfiah dan a zirin STEE category-I a Chakma zirlai leh hnamdangte thun an nih chungchangah hian thutlukna siam a ni ang,’ a ti. H&TE Minister chuan Mizoram quota beisei avanga Mizoram khua leh tuia inchhal an awm theih avangin, STEE category-I a dah Chakma zirlai 38 leh hnamdang pathumte chu Mizoram khua leh tui dik tak an ni ngei em tih an chhuichiang dawn tih a sawi a, Mizoram khua leh tui ni lo hmuhchhuah an awm chuan Category-I a\anga paih nghal an nih bakah, a \ul dan a zirin thubuai pawh siam sak an ni ang, a ti bawk.