Latest News

Zu khapna dan chungchang in sawizui a hlawh.

Mizoram-a zu khap burna Dan hman mek, The Mizoram Liquor Total Prohibition Act, 1995 thlaka The Mizoram Liquor Prohibition and Control Act 2014 hmang tura Bill pass a nih hnuah he Bill hian sawizui a hlawh nasa hle.
Hemi chungchangah hian Mizoram Pradesh Congress Committee (MPCC) Media Department chuan thuchhuah siamin Congress sorkar chu huaisen taka MLTP Act hlip ngam a nih thu tarlangin, kum 17 zet Mizorama zu khap burna dan MLTP Act hlipa, awmze nei zawka khuahkhirhna dan, MLPC Bill 2014 hman a nih theihna tura Mizoram Assembly Session-a puluttu Excise Minister Pu R. Lalzirliana chu huaisen an tih thu an tarlang bawk. Excise & Narcotics department hotute chuan MLPC Bill-2014 hi House ah passed ni tawh mahse, buaipui tur thil tam tak ala awm dawn a, tunah hian a Rules pawh ala awm lo a, chumi peih a nih hun ah pawh Law Department a kaltlang ala ngai ang a, a zawrh dan tur leh thil \ul dang tam tak buaipui tur ala awm avangin, MLPC hi hman theih a nih hun tur sawi theih ala nilo, an ti a, “MLPC Bill hman hma chuan MLTP Act hi khauh taka kenkawh a ni reng dawn a, a hma aia khauh zawk mahin kenkawh tum mek a ni," an ti bawk. Hetihlai hian Khatla Local Council buatsaih a Khatla Local Council huamchhunga Kohhran leh NGO hrang hrang kalkhawm chuan resolution siamin Khatla Local Council huamchhungah tumahin Zu zawrh loh nise an tih bakah Khatla Local Council huamchhungah Zu zawrh nana In luahtir/Godown siam/Zu sak(Factory) phalloh nise an ti bawk a, he Resolution-ah hian Local Council, Presbyterian, BCM, MUP leh MHIP aiawh ten hming an ziah laiin YMA erawh a tello thung.
    He bill hi hman a nih chuan zu siam, zu kawl, zu phurh, zu lei leh in te khuahkhirh a ni dawn a, Mizoram puma hman tur a nih rualin Autonomous District Council te chu a huam lo thung a ni. He dan thar ruahman chungchangah hian Excise Minister, Pu R. Lalzirliana chuan he dan bawhchhetu tan hian tuna dan hmanlai aiin a khauh zawk dawn tih sawiin, ‘Zu in chunga motor khalh te leh khawlaia zu rui te hremna a khauh zawk dawn a, he dan bawhchhetu man thei tur zingah mi tlawmngai te khungluh an ni dawn a, zu in leh inlo finfiahna turin Breath Analyser hman a ni dawn a, Doctor zawng zawng te enfiah theih a ni tawh dawn bawk a, tuna zu khapna dan hlih lawmtu tam tak te pawhin hremna a khauh dawn avangin Jail bang an zut phah dawn a ni,’ a ti bawk.a

Comments

Popular News (Last 30 Days)