Zu khap burna Dan thlakna tur House-ah pawm a ni.

Mizoram-a Zu khap burna dan ‘MLTP Act 1995’ thlakna tura Zu khapna leh khuah-khirhna dan thar, ‘The Mizoram Liquor (Prohibition and Control) Bill 2014’ chu nimin a Mizoram Legislative Assembly Session-ah sawiho a nih hnuin pawm a ni.
He Bill puluttu Excise Minister, Pu R. Lalzirliana chuan he Bill pulut tur hian Pathian hnenah vawi tam tak fianrial \awng\aina ah pawh a thlen tawh tih sawiin, Mizoram a Zu khap burna dan MLTP Act-1995 chu kum 1997 a\angin hman \an anih thu leh Mizorama Autonomouse District Council, Lai, Mara leh Chakma-ah te hman a ni velo tih sawiin, tun dinhmuna MLTP Act in a huam ve loh Central sorkar hnuaia hnathawk service 12 an awm tih a sawi bawk. Dan ang taka Doctor in a chawh, Zu lei leh in phalna lisence nei Civil mi 214 an awm thu leh Ex-Servicemen (Sipai bang) 2162 an awm tih sawiin, zu khap burna dan hman a ni chungin thawktu indaihlohna vang leh chhan hrang hrang vangin Mizoram-ah zu man tur alo pung tual tual a, hetiang anih tak avang hian MLTP Act ennawn a zirchiangtu tur Study Group chu din a nih thu leh Study Group in rawtna a siamte chu State Prohibition Council in thlirin, ‘MLTP Act hian a tum a hlawhtlin loh avangin dan \ha zawk Sorkar in siam rawh se’ tiin rawtna a siam a ni, a ti a. He dan thar hnuaiah hian zu rui leh rui chunga lirthei khalhte, dan lova zu kawl leh zu in te hremna na zawk siam a nih thu te pawh a tarlang bawk a ni.
    Hemi hnu hian Speaker, Pu Hiphei kaihhruaina hnuaiah he Bill sawihona hi neih nghal a ni a, he hunah hian House Leader, Pu Lal Thanhawla telin Member 25 ten an ngaihdan sawiin rorellai pawlte chuan The Mizoram Liquor (Prohibition and Control) Bill 2014 chu zu thlah zalen huau na tur nilovin, dan hnuaia \ha taka zu khuahkhirhna tur a nih thu te, Mizoram-a Zu khap burna Dan hman mek chu a hlawhtlin tawkloh thu leh Zu in \hin ten Zu \halo tak tak an in \hin avangin Zu \ha an hmuh theihna tura ruahmanna siam a nih thu leh Mizoram in a mamawh tak a nih thu te an sawi tlangpui a. Hetihlai hian Eptu lamte chuan Kohhran leh Tlawmngai pawlte pawhin MLTP Act chu hlih an remtih loh avangte, Khap burna dan hmanlai pawha rem theilo chu dan thar hnuaiah phei chuan Mizoram tana harsatna thlentu tur nia an hriat thute sawiin, dan hi an pawmpui theilo tih an sawi thung a ni.
    He Bill sawihona ah hian House Leader leh Chief Minister ni bawk, Pu Lal Thanhawla chuan he Bill an putluh avang hian Kohhran pakhatmah an do loh thu leh an khing lo tih sawiin, Kohhran thuawihlo a ti an nilo tih a sawi a, ram kaihruaitu sorkar an nih anga an tihtur ti mai an nih thu sawiin, he Bill hi Act a nih hnuah hmangin alo \halo a nih chuan siam\hat leh theih a nih avangin huaisen takin an kaltlangpui dawn tih a sawi bawk. Hemi hnu hian Eptu Member te chuan he Bill hi an pass pui theilo tih sawiin House a\angin an chhuak a, amaherawh chu Member la awm ten lungrual takin an pawm thung a ni.

Popular News