AMC huamchhungah Dawr khar dawn

Mizoram Merchant Association (MIMA) in AMC Licensing Regulations, 2012 an duhlohna an lantirna atan Vawiin July 17, 2014 hian AMC huamchhunga Dawr te khar a ni dawn. Hemi chungchangah hian Mizoram Merchant Association chuan thuchhuah siamin an pawl Extended Emergent Meeting in AMC Licensing Regulations, 2012 duhloh lantirna tura AMC Area chhung a dawr leh sumdawnna zawng zawng te Vawiin July 17, 2014-a zing dar 5:00 a\anga tlai dar 5:00 thleng khar vek tur a alo tih tawh chu kaltlangpui tur a nih thu leh hei hi zawm vek turin sumdawng zawng zawng te an ngen tih an tarlang a. AMC-a License dilna form lo la tawh zawng zawng te pawh tumahin thehlut rih lo turin an hriattir a. MIMA leh NGO Co-ordination Committee te hmalakna a ni 22.07.2014-a AMC Office kai tur dang tura ruahhmanna siam tawh anga hmalak anih hnuah pawh engmah hmasawnna a awm loh chuan NGO Co-ordination Committee te be rawn chung zelin Economic Blockade thleng a hmalak tum a nih thu leh AMC Licensing Regulations chu sumdawnna kawnga ram leilung fate chimralna tur thil anih avangin a hnam anga Mizo mipui zawng zawng in thlawp vek turin an ngen bawk. Hetihlai hian Mizoram Chamber of Commerce (MCC) chuan AMC Licencing Regulation chungchanga harsatna thleng mek chungchangah sorkar term kalta a ‘Temporary Trade licence’ buaipui tawh, Cabinet pawmpui a hman mai tur pending mek chu tharthawhin hemi hmang hian he buaina hi chinfel theih a nih an beisei thu an sawi a. Hemi atan hian hma la tura sorkar an ngen thu pawh sawiin, Mizoram sorkar chu a ram leilung fate himna ngei tur Dan a rang lama siam turin an phut bawk.

Popular News