AMC Chairman in thlawptu a ngah tawklo niin sawi.

Aizawl Municipal Council-a Opposition Councillor te chu intelkhawmin, rorellai Congress Chairman paihthlak an tum a, nimin khan MNF, ZNP leh MPC Councillor 10 te chuan Aizawl District Magistrate leh Urban Development & Poverty Alleviation Director hnenah resolution thehlutin, ‘AMC Chairman chuan Councillor thlawptu a ngah tawk tawh lo a ni’ an ti a, a nihna atanga paih tura ngenna an siam a ni.
Opposition in telkhawm te hi, MNF Councillor 5- Pu Biakthansanga, Pu Lalrinenga Sailo, Pu PC Lalhmingthanga, Pi Lalmalsawmi leh Pi Zamanthangi bakah ZNP Councillor 3- AMC Vice Chairman ni lai, Pu Zarzoliana, Pu W. Chhuanawma leh Pi Lalchhuanmawii, MPC ah chuan Pu PC. Lalruatsanga leh Pu C. Lalsawivunga te an ni. An resolution-ah chuan ‘Danin a phalsak angin, tunhnaia Council chhunga politics dinhmun inthlak danglam mekah AMC Chairman hi a hmun luah zui zel tlak a ni tawh lo a, Councillor thlawptu a ngah tawk tawh lo a ni,’ an ti a, Hemi chungchang ah hian Aizawl DC Dr. Franklin Laltinkhuma chuan AMC Opposition Councillor te ngenna chu dan ang in nithum chhungin an lo enfiah tur thu Councillor te hi a lo hrilh a, thudawn danin, an chungchang hi karleh Thawhlehni-ah ngaihtuah a ni dawn a ni. Aizawl Municipal Council hi \hiah a nih chuan ZNP Party Councillor Chairman na hnuaiah AMC thar din an tum thu Opposition lam chuan an sawi a, tun dinhmun ah Member an neih tam zawk tak avangin AMC Chairman pawh bang mai tura an phut thu an sawi a ni.
    Hemi chungchangah hian UD&PA Minister Pu Zodintluanga chuan thuthar thehdarhtute zawhna chhangin, state sorkar chuan Municipal Council-a sorkar lai chu tluang takin kal thei se a duh hle tih a sawi a, Dan in Council \hiah theihna a tarlanah, ‘Municipal Council chhungah kalphung a fello hle anih loh chuan \hiah theih a ni lo,’ tih sawiin, tunah pawh hian chuti taka fello thil a awm an hriat loh thu a sawi a ni. AMC Chairman Pu CT. Zakhuma chuan Oppostion member 10 te chu anmahni duhthlanna pawh ni chiah lo in bang tura nawrna lehkha ah hian an hming an ziak ta mai a nih a rin thu a sawi a. Kum khat awrh chauh term an neih tawh lai a, Aizawl Municipal Council hmasaber \hiat tura nawrna an nei ta mai chu pawi a tih thu sawiin, sorkar chuan tuna AMC chu a \hiah mai a rinloh thu leh a mah ngei pawhin hetianga thil a kal takah chuan a hranpa a banna thehluh hran a tum kher loh thu a sawi bawk.

Popular News