Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Tribal/Hnam hnufualte dikna leh chanvo palzuttu nia puh te lakah ZWO in FIR thehlut.

Zofa Welfare Organisation (ZWO) hruaitute chuan Tribal/Hnam hnufualte dikna leh chanvo palzutna kawnga dan bawhchhetute chungah kar kalta khan Aizawl Police Station-ah FIR 2 an thehlut tih an sawi.
Nimin June 17, 2014 khan Aizawl Press Club-ah chanchinbumite kawmin ZWO hruaitute chuan Hnam hnufualte venhimna Dan ‘The Scheduled Castes and the Scheduled Tribes (Prevention of Attrocities) Act,1989’ hnuaia thubuai, tun hmaa Aizawl District in a huamte tana ngaihtuahtu Special Court siam duh lotu, Chief Justice,Gauhati High Court lakah FIR chu June 12, 2014 khan Aizawl PS-ah an thehlut tih an sawi a. ‘He dan hnuaia Section 14-na angin he dan hnuaia thubuai ngaihtuahtu tur Special Court hi High Court Chief Justice remtihna (concurrence) a siam tur a ni a. Mahse Chief Justice hian vawiin thlenga remtihna ala pek loh avangin Special Court siam ala ni lova. Chuvangin, Chief Justice hian Aizawl Judicial District pumpui chhunga Mizo zawng zawngte lakah Dan a bawhchhia a ni,’ tiin hei vang hian tih tur tilo (willful neglect of duties) Section 4-na anga hrem theih a ni, an ti.
    Hei bakah hian ZWO chuan kumin April thla tawp lama Buhchangphai leh Ramthar Zau leileta Mizo leilet Thlam tichhia a, leilet enkawltute vau a, an rante lakluih sak chungchanga mawhphurtu Shri Shamsher Singh, Deputy Commissioner, Hailakandi lakah Kolosib Police Station-ah tun thla ni 12 khan FIR an thehlut tih pawh an sawi a. MZP ten Borapansuri-a Zofate Chawlhbuk sakna tur ram an nei chu an lawmpui thu pawh sawiin, Zofate Chawlhbuk pawh sa zo thuai se an duh tih an sawi a. Mizoram hi a huai apiang Lal hrawtna hmun ni lova, Dikna a lalna hmun, Dan rorelna ram anih theih nan theihtawp an chhuah zel dawn tih an sawi bawk.

Comments

Popular News (Last 30 Days)