Mizoram-a chengte lungrual taka chenho duh

Central YMA President Pu Lal-biakzuala chuan Mizoram chhunga cheng te chu in pumkhat a, inlungrual taka chengho turin a sawm.

YMA Day vawi 79-na puala thuchah a siam ah Central YMA President, Pu Lal-biakzuala chuan Mizorama hnam peng hrang hrangte chu in la hrang zawng ni lova thil ti turin a sawma, tun hnaiah Chakma Autonomous District Council area huamchhung Borapansury a MZP-in Zofate chawlhbuk sa tura hma a lakna chu Central YMA in a thlawp tih sawiin, MZP te hian chawlhbuk sak tumin dan ang thlapin hma an la a, Chakma te’n remti lova ram pek tawhte cancel turin hma an la leh, CADC inthlan hial an boycott hi thil pawi tak a ni a ti a. MZP te hian Zofate chawlhbuk hi sa ngei se YMA chuan a duh a, a dodaltu te pawh inngaihtuah nawna, dodal chi a ni lo tih hrechhuak turin YMA chuan a beisei a ni, a ti a ni.
    Central YMA President chuan Tripura a Bru awm mek te chu Mizo-ram-ah an rawn kir dawn a nih chuan YMA in \ha a ti tih pawh sawiin, amah-erawhchu kum 1995 Electoral Roll a hming chuang leh an thlahte nilo, midangte chu YMA chuan Mizorama an rawn kir a remti lo a ni, a ti. Tunlaia damdawi khehpuam an tih hmanga sumdawngte chunchang pawh sawiin Central YMA President chuan thil \halo leh dan kalha in ti hausa leh sum hailut hnemte chu endawng tur leh malmak ngam turin mipuite a chah a. Mihausa leh sum ngah te ngai sang mai lova mi dik leh rinawm te ngaisang zawk turin YMA member zawng zawng a chah bawk.
    Pu Lalbiakzuala chuan YMA kumpuan ‘Ram leh Hnam humhalh’ chu ti hlawhtling tura Member te ngenin, intodelhna kawnga hmalakna atan Central YMA chuan cement mistiri training a buatsaih \hin thu leh tunah hian mi 603 training pek tawh thu a thuchah sawiah hian a tarlang bawk.