Kolasib-a Salvation Army pawl 2 ten inremna siam.

Salvation Army Kolasib Vengthar Corps Biak In-a bungraw \henkhat niminpiah Pathianni-a lakchhuah a nih chungchangah nimin June 9, 2014 khan Sub-Divisional Police Officer (SDPO), Pu Lalchhuanawma office-ah pawl pahnihte inkarah inremna thuthlung siam a ni.
Kolasib Police Station a\anga thudawn danin, Kolasib Vengthar Corps Biak Ina bungraw chi hrang hrang, Pulpit, Biak In \hutthleng 10, Lectern 1, Microphone, Electric Guiter leh hmanraw dang \henkhatte chu niminpiah chawhma inkhawm ban khan Advisory Council of Salvation Army Laymen (ACSAL) mi, an Kohhran a\anga hnawhchhuah tawh ten an la chhuaka, chung hmanruate chu an inkhawm hranna, Pu R. Thandanga In ah an lalut a, hetianga an che lai hi Kohhran mi, Biak Ina thawhlawm chhiara awm tlai te chuan an hmu a, amaherawhchu in nawr buaina a chhuak lo a ni.
    Hetiang thil a thlen hnu nimin khan SDPO Office-a pawl hnihte inkara thil sawihona neiin hetah hian Salvation Army Kolasib Vengthar Kohhran a\anga hnawhchhuah tak ACSAL lam chuan Biak In bungrua an lakchhuahte chu Biak In tana anmahni thawh niin an sawi a, anmahni thawh nilo thil \henkhat awm nia lehlamin an sawi leh loan-a an lei, Sound System chungchangte pawh chinfela, dahlet leh ngaite dah let remtih a ni a, Silver Jubilee lawmna tur sum an thawhkhawm pawh insem remtih a ni. Nimin a inremna thuthlung siamnaah hian Assitant Settlement Officer, Pu Lalrinawma, Magistrate ni bawk hmaah inremna thuthlung hi siam a ni a, tun thla ni 12, Ningani khian inhmukhawm nawn lehin thil chinfel ngai engkim an chingfel dawn a ni. Thudawn danin, Kolasib Vengthar Corps a\anga hming paih, ACSAL mite hi In 70 vela Kohhran member 450 vel an ni a, Kohhran a\anga chhuak lo, tuna Biak In luahtute hi In 40 vela awm mi 200 leh 300 inkar nia sawi an ni.

Popular News