Mizoram Lok Sabha inthlanpui ah vote 62.20% a tla.

Kumin April 11-a Lok Sabha Mizoram seat khat inthlanna-a vote tla zat chu Tripura Relief Camp-a Bru vote tla tiamin za zela 62.20 a tling.

Election department hotute’n an sawi danin Mizoram chhung bika vote tla hi za zela 61.06 a ni a, Tripura Relief Camp-a Bru vote tla hi za zela 71.09 a ni a. Mizoram chhunga tla leh Bru te’n Tripura Relief Camp-a Postal Ballot hmanga an vote thlak belhkhawm chu za zela 62.20 a tling a. Hetah hian sorkar hnathawk inthlan duty leh Service Voter te’n Postal Ballot-a vote an thlak chhiar tel a la nilova. Postal Ballot hi inthlan vote chhiar \an hma zawng nghah tur a nih avangin vote chhiar ni-ah vote tla zat a hriat theih chauh dawn niin Election Department hotute chuan an sawi a ni. Election Department chhinchhiah dan chuan Mizoram chhung bika vote awm zat chu 6,97,867 a ni a, chuta \ang chuan vote 4,26,083 a tla a. Tripura Relief Camp-a Bru vote nei awm zat hi 11,243 an ni a, chuta \ang chuan mi 7,993-in April 1, 2 leh 3 khan Relief Camp 6- Naisingpara, Hazacherra, Asapara, Kaskau, Khakchangpara leh Hamsapara-ah te vote an thlak a ni. Assembly bial 40 zingah Serchhip district-a Hrangturzo bialah vote tla \ha berin za zela 75.09 a tla a, he bial ah hian Assembly bye-election neih nghal a ni bawk a. Vote tlak chhiatna ber chu Aizawl North-I bial niin za zela 52.08 chauh a tla a ni.