Sorkar laipui in sum a pek hma chuan NFSS Mizoram-ah hman a ni dawnlo.

Food, Civil Supplies and Consumer Affairs Minister Pu John Rotluangliana chuan sorkar laipuiin a tihpuitlinna tur sum a pek hma chuan National Food Security Scheme chu Mizoram-ah hman a ni lovang, a ti.

Supplies Minister Pu John Rotluangliana chuan Mizoram-a Food Security Scheme hman hi sorkar chuan a duh tih sawiin, mahse sum sen belh tur tam tham tak a awm avangin state sorkarin tun dinhmunah a tlin lo a ni, a ti a. Mizoram pum dinhmun te zirchiangin sum mamawh belh zat tur pawh sorkar laipui-ah theh thlak a nih tawh thu leh sorkar laipui chhanna nghah mek a nih thu a sawi bawk. Hei bakah hian Minister chuan sorkar laipuiin he ruahmanna hnuaiah hian mitinin thla khatah buhfai Kg 5 an dawng ang a, Kg khat cheng thum zelin an lei dawn a ni, a ti a. Mizoram-ah chuan thla khatah mi pakhatin Kg 8 zel dawngin Kg khat cRs. 9.50/- in pekchhuah a ni, a ti a. Pawisa sen belh tur hi sorkar laipuiin a tum loh chuan man to zawka buhfai tam tak lei a ngaih dawn avangin Mizoram sum dinhmunin a tlinloh thu leh Food Security Scheme in a huam ve loh turte hnena buhfai pek dan tur tihchian a la nih loh thu a sawi bawk.
    Pu John Rotluangliana chuan sorkar laipui hian buhfai phurh man leh a dahkhawmna man ang chite engmah ruahmanna fel a la siam rihlo nia a hriat thu a sawi a. Congress sorkarna state ah a taka tihpuitlin tura tih chu tih puitlin duh mahse tun dinhmunah chuan a tih ngaihna a la awmlo a ni, a ti bawk.