MZP huaihawtin Remna kawngzawh \an a ni. Rukbo ten an chhungte an rawn bepawp.

MZP General Headquarters huaihawtin nimin khan Aizawl atanga Tuipuibari thlenga ke a Remna kawngzawh (Long March) chu Aizawl a\angin neih \an a ni. 

He kawngzawh bul \anna atan hian nimin khan Aizawl Vanapa Hall kawt-ah inkhawm neih a ni a, he hunah hian MZP President Lalhmachhuana chuan thu sawiin kan ram chhunga cheng ve hnamdang ten ram leilung fate tana harsatna an siam fo mai hi a \halo hle a, \huthmun a\anga thuchhuah siam a pawi kan tih thu sawi fo mai hi a tlawmthlak kan tih avang leh runthlak kan tih em avangin thuchhuah mai duh tawk lo in \ha thawh zawnga rukbo duh loh nana remna kawng zawh hi \ul niin kan hria a, remna kawngzawh hi kan buatsaih ta a ni, a ti a. Tuikuk misual ni ngei a hriat ten Mizote pawisawi bansan tumlo a tuna rukbo ta mipathumte hi intiamkamna awm lo a chhuah a nih theih nan leh, kan ram chhunga hnam dang cheng ve zawng zawng ten ram leilung fate duhdan anga remna tluantling a awm theih nana kawng sialtu ni ve tawh tura phutna atan he kawngzawh hi kan buatsaih ta a ni, a ti bawk. He hunah hian Zoram taxi Drivers Association (ZTDA) leh Pick Up driver Association hruaitute pawhin Tuikuk hel nia rin ten an driver puite an rukbo chungchanga MZP hmalakna chu lawmawm an tih thu leh an thlawp zia lantirna turin Tuipuibari thlengin Ke in kawng an zawh ve dawn tih an sawi bawk. He Long March ah hian mi 40 vel telin nizan khan Leng-pui-ah riakin tun thla ni 11-ah zawhfel a ni ang.
    Hetihlai hian Nov. 23-a Bru misual nia rin ten an rukbo mi 3 rukbo te zing ami Sanglianthanga leh Lalzamliana te chuan nimin khan Phone hmangin an chhungte an rawn bia a. Nimin chawhma dar 11:00 vel khan Sanglianthanga hian Muthi-a awm mek a nupui chu Phone hmang hian biain hemi hnu chhun dar 12:00 vel khan Mamit-a awm a pa chu Phone hmang bawkin a be leh a. Hetah hian Sanglianthanga hian anmahni rubotute hian \ha tak an enkawl thu leh an hriselna pawh a \ha tih a sawi a, anmahni rubotu te hian hmun hrang hrangah insawnpui rengin khawchhung ah chuan vawikhat chiah an la kalpui thu leh an kalna khua pawh eng khua nge tih an hriatloh thu an sawi bawk a ni.