Serchhip-ah Faina Hapta intihsiakna lawmman sem a ni. Veng fai ber ah Serchhip P&E Veng thlan a ni.

Kumin 2013-a Faina Hapta chhunga intihsiakna a lawmman semna hun chu nimin khan Serchhip-ah neih a ni a, YMA Branch area fai ber ah Serchhip P&E Veng Branch YMA chu thlan a ni.
    Nimina faina Hapta kharna inkhawm Serchhip DC’s Conference Hall-a neih hi Pu Lalsangliana, MCS, Addl. DC, Serchhip chuan khuallian nia hmanpuiin Mizote chu tunhma lam chuan Hnam bal tak kan ni tih sawiin, amaherawh chu Pathian in min zawngchhuakin tunah chuan kan fai ta hle tih a sawi a, Faina hi hriselna leh changkanna anih thu sawiin, Pathian pawhin a ngaipawimawh a, hei vang hian a hnungzuitu keini ringtute pawh hian kan ngai pawimawh tur a ni, a ti a. Fai chu mahni taksa hriselna mai bakah min vawngtu, thuneihna leh mahni inrintawkna min petu a ni tih sawiin, Serchhip chu khawfai leh thianghlim, Mizorama District Headquarters fai ber nihna dinhmuna din tir thei tur leh midangte entawn tlaka vawng thianghlim turin mipuite a sawm bawk.
    Pu Lalhruaia EE, PHE, Serchhip kaihhruai he hunah hian Pu ST. Lalhmingmawia, Sanitation Officer chuan kumina Faina Hapta hman a nih dan tlangpui a sawi a, kumin a Faina Hapta hman chhunga inelna chi hrang hrang siama lawmman dawng tura thlanchhuah te hnenah lawmman sem nghal niin, Veng fai thlanna ah Serchhip P&E Veng chu Veng fai ber niin lawmman ah Rs 5000/- leh thuziak an dawng a, Serchhip Hmar Veng (Rs. 3000/- leh thuziak) leh Serchhip Kawnpui South Branch (Rs. 2000/- leh thuziak) ten an dawt a. Zira In fai berah Little Flower Convent School chu thlan niin lawmman ah Rs. 4000/- leh thuziak an dawng a, Govt. Primary School-III, Chhiahtlang (Rs. 2000/- leh thuziak) leh Govt. Chanmari Primary School (Rs. 1000/- leh thuziak) ten an dawt bawk a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai