Mizoram Legislative Assembly inthlanpui December 4, 2013-ah neih a ni dawn.

Election Commission of India (ECI) chuan Mizoram Legislative Assembly inthlanpui neih hun atan December 4, 2013 a ruat fel ta a, inthlan chuh tumte tan Nov. 16, 2013 thlengin hming pekluh theih a ni ang.

    Mizoram leh State dang Delhi, Madhya Pradesh, Rajasthan leh Chhatisgarh-a inthlanpui neih tur chungchang hi nimin tlai dar 4:30 khan Chief Election Commissioner of India, Pu VS Sampath chuan New Delhi-ah a puang a, hemi hnu nimin tlai khan Mizoram  Chief Electoral Officer (CEO) Ashwani Kumar chuan Aizawl-ah thuthar lakhawmtute kawmin hemi chungchang hi a sawifiah nghal a, Mizoram State tan hian inthlanpui neih tur hriattirna hi Nov. 9, 2013-ah tihchhuah a ni anga, he inthlanna chuh tumte tan hian Nov. 16, 2013 thlengin hming pekluh theih niin heng hming pekluh te hi Nov. 18, 2013-ah endik a ni anga, inthlanna chuh tura hming pelut te tan hian Nov. 20, 2013 thlengin inhnuhdawh leh theih a ni ang. Dec. 4, 2013-ah mipui ten vote an thlak anga, heng vote tla te hi December 8, 2013 ah chhiar a ni dawn a ni. Hetianga inthlanpui neih hun tur puan a nih tak avang hian Election Model code of Conducts chu hman nghal a nih thu Chief Election Commissioner, VS. Sampath chuan a sawi bawk.
    Tarlan tawh \hin angin Mizoram rual hian State 4-Delhi, Madhya Pradesh, Rajasthan leh Chhatisgarh-ah te pawh Assembly inthlanpui hi neih nghal a ni dawn a, Chhatisgarh-ah chuan inthlanpui hi thawh hnih-a neih tur niin November 11 leh 19-ah te mipui ten vote thlakin Rajasthan-ah chuan Dec. 1, 2013 ah mipui ten vote an thlak ve thung ang. Madhya Pradesh-ah November 25-ah vote thlakin Delhi-ah chuan Mizoram rualin December ni 4-ah mipui ten vote an thlak anga, heng State 5-a inthlanpui neiha vote tla te hi a rual vekin December 8-ah chhiar a ni dawn a ni.