Mizoram-a inthlanpui ah NOTA hman a ni dawn. Relief camp-ah vote thlak leh rin a ni bawk.

Inthlannaa vote thlaktute’n candidate zinga vote duh pakhat mah an nei lo tihlanna atana Electronic Voting Machine (EVM) Ballot Unit hmeh theih tura ‘NOTA’ (None of the above) tih hmehna tur dah tel tur chu Mizoram Assembly inthlan lo awm turah hman a ni ve dawn.

    He thu hi Inrinni khan Joint Chief Election Officer Pu H. Lalengmawia chuan thuthar thehdarhtu te hma-ah a sawifiah a, he ruahmanna hi kumin kumtawp lama state 5-a Assembly inthlanna ah hman \an tura ruahman a nih thu sawiin, NOTA chungchangah hian Election Commission of India chuan mipuite’n enge anih a, a awmzia an hriat theih nan puanzar ngei ngei tura tih a nih thu a sawi bawk. Hemi chungchang hian September Ni 27 khan Supreme Court in thutlukna siamin Candidate vote tur engemawzat awmah, vote thlak tura kal pawh nimahsela, vote thlaktu-in candidate zingah duh ka neilo tia vote an thlak theih na siam turin Election Commission chu a hriattir a ni. EVM-ah hian candidate-te hming zawna hmehna tur intlar thla-a a tawp berah NOTA hi hmeh theih turin dah a ni dawn a, NOTA hi khawvel ram 17-ah pawh hman a ni tawh niin Pu Lalengmawia chuan a sawi a ni.
    Hetihlai hian Tripura Relief Camp-a Bru awmte tana a bik taka Electoral Roll-a hming chuang lote thun belh theihna hun siama buaipui turin Special Registration Drive kalpui mek a nih thu a sawi a, Mizoram pumah Electoral Roll a thun thar duhte tan dilna hun hawn reng a nih thu leh chutih rualin Bru Relief Camp-a awmte chungchang hi chu a bika Election Commission thu anga kalpui a nih thu sawiin, Relief Camp-a Bru vote neite hian Mizoram Assembly inthlan lo awm turah kum 2008 assembly inthlannaa tihdan ang bawkin Postal Ballot hmangin vote an thlak tura ngaih a nih thu leh ECI a\ang erawhin kaihhruaina fumfe ala awm chuanglo tih a sawi bawk. Bru Relief Camp-ah hian tun dinhmunah vote nei mi 11,311 an awm a, heng vote neite hi district pathum  Mamit, Kolasib leh Lunglei district huamchhunga Assembly bial 9 - Hachhek, Dampa, Mamit, Tuirial, Kolasib, Serlui, Lunglei South, Thorang leh West Tuipui-a vote neite an ni hlawm a, Naisingpara Relief Camp-ah hian vote nei 5,872 awmin an tam ber a, Khakchangpara-ah vote nei 390 awmin an tlem ber thung a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai