Mizoram Assembly inthlan leh vote chhiar hun tur Mizoram Synod in sawn an duh thu an sawi.

Election Commission of India in Mizoram Assembly inthlanpui  neih hun tur Dec. 4, 2013 leh Vote chhiar hun tur Dec. 8, 2013 a a ruat chu Mizoram Synod hruaitute chuan sawn leh nise an duh thu an sawi.
    Mizoram Synod hruaitu pali-Executive Secretary Rev Lalzuithanga, Secretary Rev. H. Lalrinmawia, Finance Officer Rev. Dr. Lalbiakmawia leh Statistician Rev Lalthangmawia te chuan Inrinni khan Chief Electoral Officer Pu Ashwini Kumar chu hmu-in vote thlak ni hi Synod khawmpui rorel inkhawm ni pawimawh tak a nih avangin mi 3,000 aia tlem lovin vote an thlak theih loh phah dawn tih an hrilh a. Vote chhiar ni tura ruat December ni 8 chu Pathianni a nih bawk avangin tidanglam turin an ngen bawk a ni. Synod Puipate zinga a mi Rev K. Lalthangmawia chuan CEO leh Election Department hotute chuan Thawh\anni lamah Chief Election Commissioner hnenah an ngenna hi ziak turin an lo rawn niin a sawi a, Mizoram Synod puipate chuan inthlan hun hi Madhya Pradesh rualin November ni 25 angah te sawn a rem mai lo’m ni tiin rawtna an siam nia hriat a ni. CEO hian Election Commission thu thu a nih thu leh anni’n awm an tih chuan an thlak danglam thei tih a lo hrilh tih a sawi bawk a ni.
    Joint CEO Pu H. Lalengmawia chuan Synod hruaitute hi Election Commission hnena direct-a dilna siam emaw an hnena thehluha anni’n an lo thawn thlak sak emaw a theih thu an lo hrilh niin a sawi a, Kohhran hruaitute hian Election Commission leh Mizoram Election Department duhdan angin vote nei zawng zawngin vote thlak se tih vote tla tam se an duh thu CEO leh a thawhpuite hi an hrilh a. Vote thlak vek tura Kohhran member-te an duh thu hi thuchah an siamah an tarlang a, chubakah tualchhung Kohhran tinah an inzirtir bawk niin an sawi a. Chutih laia vote thlak uar tura zirtirtu zing ami Kohhran hruaitute leh Synod palai mi sang tel vote thlak thei lova an awm tur chu fello hle-a an hriat thu an tarlang a ni. Kum 2008 Mizoram Assembly inthlanah khan vote thlak ni tura ruat Nov. 30 kha Sabbath (Inrinni) a nih avangin Seventh Day Adventist Kohhran chuan sawn turin Election Commission-ah an thlen a, he ngenna hi ngai pawi-mawh in December ni 2-ah a lo sawn tawh a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai