Latest News

Election puan vangin Bru laklet hna chawlhsan rih a ni dawn.

Election Commission in Mizoram Assembly inthlan hun a puan tawh avangin inthlan leh a behbawm zawh fel hma chuan Tripura relief camp a\anga Bru ho laklet hna chhunzawm a ni dawn lo.
Mamit District Bawrhsap Pu V. Lalremthanga sawi danin tunhnaia Mamit District leh Bru Relief Camp tlawhtu Election Commission Director General Pu Ashish Srivastava khan Bru laklet hi inthlan vuakvet chhung atana chawlhsan turin thu a rawn a. Election Model Code of Conduct-ah hian thil kallai chu chhunzawm phal ni mah sela \anpuina dawng tur a thara thlan khap a ni a. Bru lokir turte pawh hi a thar zel tur an ni a, an lokir hunah sorkarin sum a pek dawn avangin Election Model Code of Conduct a kalh dawn a, chuvang chuan inthlan zawh fel hma chuan laklet chhunzawm an ni dawn tawh lo a ni. Pu Srivastava hian Ningani khan North Tripura district-a Bru relief camp lian ber Naisingpara a tlawh a, Relief Camp-a awm, Mizorama vote neite chu Postal Ballot hmanga vote an thlak theih dan tur ruahman a nih dawn thu a hrilh a, Mizoram election hnathawkte a hmunah kalin vote thlak hi an buaipui dawn tih a sawi a ni. Bru Relief camp-a awm vote nei hi mi 11,311 an ni a; district 3 – Mamit, Kolasib leh Lunglei-a Assembly bial hrang hrang 9-a vote neite an ni hlawm. Election department hotute’n an sawi danin Bru vote neite vote thlakna atan hian Electronic Voting Machine hman a rem ve lova, Relief camp pakhata awmte pawh bial hrang hranga vote nei an nih si avangin camp pakhata Postal Ballot hmanga vote an thlak mai kha a remchangin a samkhai ber niin an sawi a ni.

Comments

Popular News (Last 30 Days)