Bru Relief Camp-ah vote thlak leh a ni dawn.

December ni 4-a Mizoram Assembly inthlanna neih turah Tripura Relief Camp-a awm mek Mizoram Bru te chu vote thlak tir leh a ni dawn.
Joint Chief Electoral Officer Pu H. Lalengmawia sawi danin Relief Camp a awm Bru mi vote neite hi an vaiin 11,311 an tling a, Election Commission-in tihdan tur a la rawn hriattir lo nachungin inthlan hnuhnung bera tihdan angin Bru awmna relief camp-ah hian inthlan buaipuitute kalin vote an thlak tir turah ngaih a ni a. Relief camp pakhatah pawh Assembly bial hrang hrang a vote nei an awm khawm avangin Electronic Voting Machine (EVM) hmanga vote thlak a rem dawn lova, chuvangin Ballot Paper leh Ballot Box hmangin vote an thlak tir rin a ni. Election department hotute sawi danin Relief Camp a awm zinga vote neite hi Mamit, Kolasib leh Lunglei district mite an ni a, Assembly bial 9-ah an inzar pharh a ni. Heng zingah hian Mamit district huamchhung, Hachhek, Dampa leh Mamit biala vote nei an tam ber a, 8,900 an tling a, Kolasib district chhunga Tuirial, Kolasib leh Serlui bial a vote neite’n dawtin 1,708 an tlinga, Lunglei district-a Lunglei South, Thorang leh West Tuipui biala vote neite chu 700 an ni bawk a ni.

Popular News

MZI ten thisen an pe

Mamit-ah ‘Free Coaching Class’ hawng

MUP ten kawng kam thianfai

Roll ennawn a ni leh dawn