MZU zirlaite leh ZNP President an inkawm.

Mizoram University (MZU)-a Political Science Deptt. zirlaite chuan tunkar Ningani khan ZNP President Lalduhoma chu MZU Campus-ah an kawm a, tunlai Zoram politics leh inthlanpui lo awm tur an sawipui.
Inkawmho hma a thusawitu Lalduhoma chuan ZNP Political Goal chungchang sawiin, “Mizote hi tuna state dinhmuna lungawi mai tur kan ni lo a. Kum 2007 September thla a UN General Assembly in thutlukna a lo siam tawh angin leh India sorkar ngei pawhin a remtih UN resolution tihlawhtling turin theihtawp kan chhuah dawn a. ZNP chauhin he thu hi kan aupui a, party dang hi chuan an aupui ve lo, hnamdang party an nih vangte, remna thuthungin a phuar vangte a ni ang” a ti a. “Sorkarna kan chang thei anih chuan Official Resolution siamin kan pass dawn a ni” a ti. MZU Political Science Department buatsaih he sawihona ah hian ram leilung hausakna haichhuah chungchanga Mizo hnam himna tur chungchangte, Mizoram leh India in vawikhat mah inremna thuthlung an la ziah loh thu leh Political Party pakhat leh India sorkar Home Ministry inremna anih zawk thu te, chu inremna chu Pu Laldenga’n Mizoram sorkar aiawh ni lo, MNF aiawh (on behalf of MNF)-a ziak anih thu te sawi ho a ni. Zo hnahthlak inpumkhatna chungchangah ZNP President chuan, “Mizo an nih chuan khawi hmun ami pawh ZNP chuan ‘foreigner’ kan ti ve dawn lo. Kan ti ngai dawn bawk hek lo. British in barhluih ramri min kham sak a, hei hi kan pawm ve lo. Bangladesh leh Myanmar ramri hung pawh hi kan duh lo a, Assembly House atangin kan lo chhuak tau tawh a ni” a ti bawk.

Popular News

Mizoram-ah Faina Hapta hman \an leh a ni

Retailer bukna diklo 3 man