YMA TEL LO IN I AWM THEI EM?

YMA TEL LO IN I AWM THEI EM?
- Maro Colneya Bungsut
    Facebook Group pakhatah chuan, "YMA tel lo in kan awm thei," tih thu ka chhiar fuh a, sawi zui a hlawh khawp mai. Kha kha ram hnuk khawih thei thil a nih avangin ngaihtuah zui tham tak a ni.

    Kan venga YMA Secretary ka nih hun chhung khan hreh tak chungin YMA in, Chhungkaw pakhat ruihhlo an zawrh avanga kan en san tak te an awm a. Kan en san chhung khan chhungkaw pa ber khan a boral san leh ta si. Chhiat tawh chiah khan YMA hi enge a nih a lo lang ta. Mitthi chhung leh khat ten ruang awm lai khan ngaihdam dilna an rawn thehlut a, chawpchilh takin kan han \hukhawma, an chhungkua kan en a, kan khawngaih lutuk. Mahse, 'YMA hi enge a nih a, YMA en san hian eng ang takin nge nghawng a neih?' tih hi mipui nawlpui hria se, kan tih avang khan hreawm ti chung chung khan ngaihdam dilna chu kan hnawl ta a.
    YMA in a ensan chhungkua chu YMA bungua engmah an hawh theih loh avangin Thlan lai turin vengchhungah chhungkhat laina an in sawm kuala, thlanlaihna hmanrua engkim an in tum chawp. Tin, Thingpui lumna Bungbel, \hutthleng, aurinna, mitthi chhungkua in an mamawh engkim mai kha YMA in a kawl kim vek a, chutiang zawng zawng awlsam taka hawh theih kha, an ni chhungkua chuan an hawh thei ta si lo. Kohhran Bungrua hawh an dil a, YMA in a ensan avangin Kohhran pawn a phal bawk si lo. Buai tak chungin mitthi vui tura kalkhawmte \hutna turin School \hutthleng kha an hawh sak ta ringawt mai a. Chhiattawh ah kher kher mahni leh mahni han in buaipui hreawm zia an han hria chu an khawngaih thlak zawk hial a ni.
    Tunlai hian YMA tihsual chang ran mai kan awm niin ka hria. Ram \hatna duhin YMA chuan hna thawkin ram a veng hima, chumi a kal kawngah chuan thil palthluk a nei fo mai. Ram venghim tura Sipai kan rin em em te pawn pawi sawi lo lakah tha thlah palh chang an nei \hin bawk. Amaherawhchu, chungte avang chuan pawisawilo lakah tha thlah zel tur tihna a ni chuang lo a, fimkhur taka kal theih nana in hriattirna a ni zawk.
    Pa in a fa a hmangaih a nih chuan a vua anga, a tihsualah hremna alek kawh \hin. Chutiang bawkin Sikul a zirlai naupangin thu a awihloh pawn zirtirtu chuan naupang chu a huat vang nilovin, a \hatna leh a hmakhua a ngaih avangin hremna a pe a. Naupang chuan \hatchhuah nan leh thuawih nan hremna chu a hmang \hin bawk. Pa in a fa a hmangaihna avanga a vuak a, a \ap thawm thenawm pa in a hriatin, \henawmpa chuan, A \henawmpa, a fa a hmangaih leh \hatna duh vanga a vuakna chhan chu a hre lo thei. Chutih hunah chuan a fa vaw tu chu 'sual' a ti em em a, pawisawilo vaw fo ah midang hnenah a sawi thei bawk. Chutiang ang hmalakna chu kan rama pawl lian ber YMA chuan a hmanga, mipui nawlpuiin a \hatna kan hmu \hin a ni.
    YMA hi sawisel nasa tu apiang hian, "YMA hian enge a tih?" tih a hriat chiang loh vang niin ka hria. Tin, YMA hruaitu hahzia leh mawhphurhna san zia hrelo hian kan 'kawk' rawn fo mai a. Hruaitu dinhmuna han din meuh chuan YMA hruaitu nih hi thil namai a nih loh zia a hriat theih. Kan \hian pakhat chuan, "YMA hi tunlai hian Facebook-ah an sawisel nasa \hin a, a sawisel nasa tute hi bih chiang ila, YMA thiltih, hnatlan nikhua ni a chhuak peih lo hi an ni duh, tin, facebook khawiha nileng lenga awm awl \hinte, zankhaw taireka meng fo, chhungte ti hah ho hi an ni duh," a ti. A dikna kawng  atam khawp mai thei a ni. YMA ah hian zirtham thil a awm a ni, tih hrelo tan chuan sawisel fo hi thil awlsam a ni fo reng ang. "YMA tellovin ka awm thei tawh e, kan chhungkua hia YMA kan mamawh tawh lo," i ti nih chuan YMA membership fee kumbulah pe lo ngam rawh. Tin, YMA sawisel fo engtu i nih chuan YMA member a\ang banna pawh thehlut hreh suh. A pawina a awm lo. YMA tello leh YMA hliahkhuhna tel lo hian chhiatni \hatni hi han hmang ve teh.
    Mizo inti tawh zawng zawng thlung khawmtu YMA hi kan hruipui, a chah vaih chuan Mizo zawng zawng boral theihna a ni. YMA tlukpui pawl dang ang hi a chhuak leh tawh lovang. Mizo kan nihna tichiangtu YMA hi i tan chuan thlawp mai a \ha. Mizo, ze nghet neilo, thil\ha zawng zawng hre kim vek, kan ram \hatna tur zawng zawng pawh Tapchhak zawl a\anga sawi thei vek kan ni a. Chutiang khawpa fing nisi chuan kan ram \han leh zelna tur atan thiltih kan peih chuang lo. Kan ram \hatna tur leh venghim tura hmala chu YMA hi a ni.

Popular News

Mizoram-ah Faina Hapta hman \an leh a ni

Retailer bukna diklo 3 man