Rajiv Gandhi Grameen LPG Vitrak hnuaiah Mizoram-ah Gas Agent 11 hawn a ni tawh

Mizoram-a Gas Agent la awmlohna khaw 28-ah Rajiv Gandhi Grameen LPG Vitrak (RGGLV) Scheme hnuaiah Gas Agent dah tum a ni a, chung zinga 11 chu tih hlawhtlin a ni tawh.

    He thu hi kar kalta Zirtawpni-a Rajiv Gandhi Grameen LPG Vitrak hnuaia Chhing-chhip leh a chheh vel chawmtu gas agent thar S. K. Indane Gramin Vitrak hawnna inkhawm Chhingchhip Community Hall-a neih ah sawiin Supply Minister, Pu H. Rohluna chuan mipui mamawh phuhruk chu Sorkar tum ber a ni tih sawiin, eirawngbawlna gas mamawh phuhruk lamah pawh chak tak hma la in thingtlang miten awlsam zawka gas an lak theihna atan sorkar laipuiin a duan Rajiv Gandhi Grameen LPG Vitrak (RGGLV) Scheme chu chak taka bawhzui a nih thu a sawi a, hemi atana thil \ul zawng zawng IOC in chak taka an bawhzui avanga lawmthu sawiin, Mualkhang Gas Bottling Plant tih zauh tumna kawnga ram an lak tur chungchangah harsatna a awm avangin Thenzawl ah Gas Bottling Plant thar dah a nih theih nan IOC lam te dawr mek anih thu a sawi bawk.
    Chhingchhip-a Gas Agent thar hi bialtu MLA, Pu K. Lianzuala chuan hawngin Hmar-chhak state thekhata RGGLV tlem te chiah hawn a nih laia hun reilo tea Mizorama RGGLV agent khaw 11 laia hawn a ni hi thil chhuanawm tak leh chinchhiah tlak a ni, a ti a, Sainik School atana Chhingchhip-a chhungkaw 40 in an huan lo ram, zangnadawmna beisei miah lova, a thlawnna an pek hi a ropui takzeta, an inpekna hi a chhuanawmin a entawntlak hle a ni, a ti bawk. RGGLV hi thingtlang miten awlsam zawka eirawng-bawlna gas an lak ve theih nan sorkar Laipuiin a duan a ni a, tuna hawn loha la awm te pawh hun reilote chhunga hawn theih beisei niin kar kalta a hawn tak S.K. Indane Gramin Vitrak hian Chhingchhip leh a chhehvel khaw dang 8 a chawm dawn a ni.