Mizoram pum ah vote nei thei mi 6,86,305

Kumin kumtawpa Mizoram in Assembly inthlanpui a hmachhawn tur thlira Photo Electoral Roll siam thar chu peihfel a nih hnuah Mizoram pum ah vote nei thei mi 6,86,305 an awm.

Tun thla ni 16-a tarchhuah tak Mizoram Photo Electoral Roll thar berah hianChhiarpui neih hnuhnung bera Mizorama mihring awm zat atanga chhutin vote nei zat hi za zela 60.04 an ni a, kumin January ni 15-a Electoral Roll Summary Revision zawh fel takah khan Mizorama vote nei zawng zawng chu 6,80,255 an ni a, Electoral Roll Special Summary Revision, nimin a zawh fel takah hian 6,050-in an pung a ni. Tun tuma Electoral Roll ennawnnaah hian Polling Station thar 58 siam belh a ni a, chumi nen chuan Zoram puma Polling Station awm zat chu 1,126 a tling ta bawk.

Electoral Roll thar, nimin a peih fel taka District hrang hranga vote nei awm zat chu, Mamit District-ah 56,733, mipa 28,915, hmeichhia 27,858 a ni a, Polling Station 110 a awm a, Kolasib District-ah chuan vote nei zawng zawng 51,013 zinga 25,266 chu mipa an ni a, a bak 25,747 chu hmeichhia an ni. Kolasib Districtah hian Polling Station 76 siam a ni bawk. Aizawl District-ah chuan vote nei zawng zawng 2,58,153 an ni a, an zinga 1,23,645 chu mipa an ni a, a bak 1,34,508 chu hmeichhia an ni a, Aizawl District-ah hian Polling Station 323 a awm a ni. Champhai District-ah chuan vote nei zawng zawng 77,287 an ni , an zinga 38,433 chu mipa an ni a, a bak 38,854 chu hmeichhia an ni a, Polling Station 133 an nei a ni. Serchhip District-ah chuan vote nei zawng zawng 44,688 an ni a, an zinga 22,023 chu mipa, a bak 22,665 chu hmeichhia an ni a, Polling Station 77 siam a ni bawk. Lunglei District-ah chuan vote nei 94,283 an awm a, an zinga 47,157 chu mipa an ni a, a bak 47,126 chu hmeichhia an ni a, Polling Station 175 siam a ni. Lawngtlai District-ah chuan vote nei zawng zawng 70,437 an ni a, mipa 34,879 leh hmeichhia 35,558 an ni a, Polling Station 159 a awm a ni. Saiha District-ah vote nei an tlem ber a, 33,671 an ni a, mipa 16,481 leh hmeichhia 17,190 an ni a, Polling Station 73 siam a ni bawk.  
Assembly Constituency hrang hrang 40 zinga vote nei thei tamna ber chu Lawngtlai District-a Tuichawng bialah a ni a, vote nei 26,268 an awm a ni. Vote nei tlemna ber bial chu Lunglei District-a Thorang bial a ni a, vote nei 12,349 an awm a ni. Tun tuma Electoral Roll ennawnnaah hian vote nei pun tlemna ber chu Serchhip District-a Tuikum bial a ni a, he bialah hian vote nei zat an pung lo a, za zela 1.11 in an tlem zawk a ni. Vote pun tamna ber, Mamit District-a Hachhek bialah chuan za zela 3.72-in an pung thung a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai