TUIVAI HP SIAM HNA PRIVATE COMPANY KUTAH PEK A NI DAWN
Kawlphetha MW 210 pechhuak thei tura ruahman Tuivai Hydel Project siam hna chu Private Company kutah pek a ni dawn a, khawvel pum huap (global tender) hmanga thlan tur a ni dawn.
He thu hi Power and Electricity Department-in an Department hnathawh leh hmalak mek te, ni li chhunga thlirhona an neih ‘Review Meeting’ tawp ni, Zirtawpni tlai khan sawichhuah a ni a. Tuivai Hydel Project hi kum 5 chhunga zawh tura beisei an ni dawn a, power siamchhuah zawng zawng chu unit khat Rs. 3.55/- zelin kum 35 chung Mizoram Sorkar hnenah a siamtu company hian hralh ang. He hunah hian hian tunhnaia Sorkar Laipuiin rampumah a vawikhatna atana Viability Gap Funding (VGF) hmanga kawlphetha siamchhuahna remtihna a pek leh a rawn sanctioned he Tuivai Hydel Project chungchang hi inhrilh-hriatna neih a ni.
     He hun hmanpuitu Parliamentary Secretary Pu Lal Thanzara chuan Tuvai Hydel Project Sorkar Laipuiin a rawn pawm tak hi harsatna hrang hrang paltlang a Mizoram Sorkar in a sualchhuah a nih thu a sawi a. He Project a puitlin hunah chuan kawlphe-tha a intodelh piah lamah power tam tham tak hralh tur Mizoramin a nei dawn a, hei hian hun lo kal zel turah Mizoram economy chu nasa takin a pui thei dawn a ni, a ti. He hun hi Pu L. Pachuau, Chief Engineer (Distribution) chuan a kaihruai a, Engineer-in-Chief Pu C.L. Thangliana chuan Tuivai Hydel Project atana hma an lak dan hrang hrang te, he Project kal-hmang dan tur te a sawi a. An Department hmalakna hrang hrang te pawh a tarlang bawk a ni.
    Power and Electricity Department hian RGGVY hnuaia khaw 137-a hnathawh turah 94 an zo tawh a, he’ng zinga 34 chu hawn theih \ep a ni tawh a, Sakawrdai, Phullen leh khaw dang pahniha Sub-station sak mek chu an peihfel thawhkhat tawh bawk. Consumer te’n kawlphetha an hman zat te, felfai zawka kawlpetha pekchhuah dan leh hengte chhin-chhiah dante leh power ruk danna atana Consumer Indexing an kalpui mek chu November thlaah zawhfel an beisei thu P&E hotute hian an sawi. Consumer Indexing zawhfel hnu hi chuan consumer te’n current an pawh dan chu GIS hmanga chhinchhiah vek a nih dawn avangin current pawh ruk theilo tura ngaih a ni.

Popular News

MZI ten thisen an pe

Mamit-ah ‘Free Coaching Class’ hawng

MUP ten kawng kam thianfai

Roll ennawn a ni leh dawn