Latest News

Governor laka lungawilo Ex-MNA Serchhip ten Mizoram Governor thlalak Serchhip-ah an hal.
India leh MNF ten inremna an ziah avanga MNF sipai rawn haw, Ex-Mizo National Army (Ex-MNA) Serchhip District chuan Mizoram Larsap, Pu Vakkom Purushothaman-a lem chu nimin (8th August, 2013) khan Serchhip Bazar tual-ah an hal.


    Serchhip Bazar tual-a Martar te Lungphun-a he hun hmanna ah hian EX-MNA Association, Serchhip District chuan MNF te leh India sorkarin inremna an ziahah High Court hranpa Mizoram in a neihna tur te, inremna ziah a nih rual rualin rambuai laia MNF mi leh sa, sorkar pawi khawih te thubuai nuai reh nghal vekna tur te a awm chungin, heng te hi tunah tihhlawhtlin a la nih loh thu Mizoram Governor hnena an thlen thu tarlangin, Governor Pu Vakkom Purusthaman-a’n ngai pawimawh lo tak leh anmahni pawh tham lo takin a lo dawngsawng nia sawiin, an lawm lo takzet tih an sawi a, Mizoram in High Court kan nei thei reng chung sia nei tura hma la duh lovah Governor chu puhin, Governor chet dan hi India sorkar leh MNF inremna leh Mizo mipuite zahlohnaa an ngaih thu an sawi a, Governor chu Mizorama awm tlak lova ngaiin a rang thei ang berin Mizoram chhuahsan tura an duh thu an sawi a, hemi hnu hian Mizoram Larsap thlalak chu an hal nghal a ni.
    Mizoram Governor chunga lungawi lohna lantirna hun hman hi Pu R. Thangzauva, President, EX-MNA Association, Serchhip District chuan kaihruaiin Pu Lalhmingliana, Adviser, EX-MNA Association, Serchhip District in thu a sawi a, he huna kalkhawm te chuan resolution siamin ‘EX-MNA Association General Hqrs. in Remna thuthlung la tihpuittlin loh leh tih puitlin a nih theih nana hma an lak naah, June ni 18, 2013-a Governor Vakkom B. Purushothaman an hmuh a Governor-in a lo chhanna hi Mizoram Accord ngaihnepna, Mizo mipui zah lohna leh hmuhsitnaah Ex-MNA Association General Hqrs. chuan a ngai a, a la thutak hle a, chuvangin Governor Vakkom B. Purushothaman hi Mizorama awm reng tlakah a ngai lo va, Mizoram Accord tih puitlin loh a nih avanga Zoram in thim (Mizoram Second Uprising) a hmachhawn a nih chuan, a mawh a phur ang. Governor hian a rang thei ang berin Mizoram chhuahsan nghal rawh se,’ tiin an tarlang a ni.

Comments

Popular News (Last 30 Days)